كتب / انتصار محمود مقبل
في جروبات لما تدخلها تحس بغثيان يخليك وكأنك باتطرش فوق شاشة تلفونك والسبب جماعة مطبلين متخصصين بالمراويس والطبول ويطبلوا بضمير حي :
التركي خط احمر / التركي رجل المهمات الصعبة / التركي رجل بحجم وطن / ليت المحافظين كلهم كما تركي لحج ومن ذا الهرج يرجموا به في الجروبات .
طيب ولا في حد منكم يامطبلين يعاني من الغاز والسراج والماء ؟؟؟ يعني الامور سابرة عندكم ، اربع او ست ساعات يلصى السراج في بيوتكم خلال ال 24 ساعة واهلكم وجهالكم وعجيزكم يلهبوا من الحمى والضمأ .
اتمنى واحد منكم يقول كلمة حق ويكتب منشور للتركي يفهمه ان الناس تعاني في الحوطة وتبن وبقية مديريات المحافظة من انعدام الغاز وانقطاع السراج اللي زاد عن حده .
اتمنى واحد منكم يلتقي بالتركي في مكتبه المكيف بما انكم دوبكم عنده وكلكم مسؤولين ياإما مستشارين او مدراء عموم او شيوخ او مندري شوه ويكلمه ان هذا البرود اللي في مكتبه يخوره المريض والجاهل والشيبة في كل بيت في الحوطة وتبن ، فهموه كم تشتروا في اليوم برد منشان تشربوا قـُب ماء بارد وكم تعبوا بوز ماء في الأسبوع وبكم تعبوا دبة الغاز وإن ظروف الناس المادية مش عاد تسمح .
قولوا كلمة حق ولو مرة وحدة في حياتكم بدل المراويس والطبول اللي خويتونا بها .
كيه هكه طلعوني غلطانة عليكم وخلوني شوف واحد منكم يهرج في جروبات المراويس ويكتب ان المواطن اللحجي قده بغران من حياته في هذا الحمى – واللي عاد شهور الحمى الحقيقية مش دخلت – ويطلب من المحافظ التركي يرحم هذا المواطن ويحاول باللي يقدر عليه يخفف هذه المعاناة بتوفير الديزل للمحطات وقولوا له ال 18 او ال 20 ساعة طافيين خلال ال 24 ساعة يومياً ظلم كبير لهم ، ظلم في حق المرضى والجهال والعجزة ، وقبل ماتقولوا ان موضوع الديزل مش يخصه وانه موضوع سيادي ومركزي ومن ذا الهرج بارد عليكم : يعمل زي مايعملوا في عدن . شي سمعتوا انهم في عدن جلسوا اكثر من 12 ساعة متواصلة بدون سراج ؟؟ – هذا مش يحصل إلأ في جمهورية لحج – طيب من وين يدبروا الديزل ؟؟ وين محافظنا والمسؤولين في كهرباء لحج مايدبروه زي محافظة عدن .
ارحمونا من الطبول شعوا مش كل اللحوج مطبلين ، في لحوج يشوفوا طبلكم ويضحكوا عليكم وعلى طبالكم اللي مش يمز الراس . كثرتوا بها اتقوا الله وقولوا كلمة حق لأنكم تعتبروا كذابين وشهود زور فرملوا في التطبيل رحمةً بالمواطن اللحجي .
